Tango, sé yonn adan lé ritm an plis enmé. Ki sa yé tango pannyòl, oben milonga, on tango ki vwè jou an Amérik latin (èvè akòwdéyon).

    Banmwen prézanté zòt Adriana Varela. Sé on chantèz tango ki fèt a Avellaneda (Ajantin)…

    Sé yonn adan lé dènyé chantèz ki ni on vwa grav, sa ki ka ba èstil-ay on touch spésyal. Zòt pé tan mòso-ay adan fim kon Tango, on fim a Carlos Saura, on dirèktè a fim pannyòl (an ké prézanté-y adan on dòt artik davwa an enmé fim-lasa toubòlman ).

   Adriana Varela ni on jan i ka viv tango, i paka yenki chanté-y, mè i ka èksprimé-y menm. Dayèpouyonn, lé kònnésè ka di tango, apa pou ou chanté-y (konprann “hélé-y” kon onlo chantè é chantèz ka fè), mè sé pou "di-y". Sé sa Ardiana Varela ka fè byen menm.

    Mi kèk yonn adan mòso-ay an enmé pou zòt pé kouté tibwen.

    An ka konmansé èvè « Me gustas cuando callas ». Avan divini on mòso tango, sété on powèm a Pablo Neruda. An ké prézanté powèt-la adan on dòt artik

   Alè, mi « Quién hubiera dicho », chanté-la zòt pé tan an konmansman a Tango (Carlos Saura).

   Aprésa, mi « De la canilla », avan mòso-la, ni on lèsplikasyon (Adriana Varela ka palé dè kontré-ay èvè Jaime Ross, on gran mizisyen dè Irigwé).

    « Los mareados », kouté mizik-lasa tibwen…

    É pou bout artik-la, mi on ti asanblaj a twa ti mòso ki pa mové : « Quién hubiera dicho », « Silbando » é « Absurdo ».

Viv tango !

W.P