-
Tracy Chapman ka transmèt nanm-ay an mizik
Par Whyz Panthera dans ¤ Proses et humeurs / Proses and moods / Prosas y humores / Pwòz é imè le 20 Mars 2011 à 12:05Mi on chantèz an enmé onlo. Tracy Chapman ni on vwa é on èstil ki byen tay…
Chantèz amérikenn-la fèt a Cleveland (Ohio). Dèpi toupiti,…
… poézi é mizik té ja ka entérésé-y (i maké onlo powèm ! ). An konmansman-ay, i téka chanté yenki lè i té kalé légliz avè manman-y oben adan ba. Aprésa, pwodiktè-ay, Elektra Records, touvé-y é sé la i konmansé bèl kayè-ay.
An pé yenki admiré pèsonnalité-ay. Lè i ka chanté, sé ba kyè an-nou i ka chanté, pawòl-ay ka travèsé nanm an-nou, mè chantèz-la ka rété enb, i jou timid. Tracy Chapman, sé on fanm sansib, i ka maké pwòp tèks-ay é i ka chanté osi pou kòz enpòwtan (on ègzanp : an 1988, i ay chanté an Afrik di sid kont povrèté, rasizm é mové kondisyon a vi a fanm).
An téké pé di onlo asi chantèz-lasa, mè an ké kout. An jis ka fè zòt jété on zyé asi on chantèz ki ni on gran noblès : limanité-ay.
Kouté pawòl-ay…
An prèmyé, an ka mèt « At this point in my life », oben rédanmsyon a on fanm amourèz… (apa zimaj a klip-la, mè mizik-la toujou la )
Alè, mi « The Promise », on limn a lanmou an mizik…
Mi sé dé mòso-la an dékouvè an prèmyé : « Sorry »
É « Give me one reason ».
Mi on dòt ki pa move nonplis : « Talking about a revolution ».
An vlé mèt osi dé adan prèmyé mòso a karyè-ay : « Sing for you »
É « Fast car ».
Kijan an téké pé bout artik-la san an mèt on mòso ki ka rèprézanté menm fòs a lidé a Tracy Chapman ? Pa jan obliyé pli gran richès aw : nanm-aw… « All that you have is your soul »…
W.P
-
Commentaires